2Ti 3 | KYG | STEP | Mani hemeni kaha paisuva gemo alagepa huka afiyo. Henaga'amo hosu afina'mo afole aisige'apae'mo lusi kanamo aligae.

2 Timothy 3

Henaga'amo asole hanageke ya'mo afole aigiye, huno hu'niya gemae

1 Mani hemeni kaha paisuva gemo alagepa huka afiyo. Henaga'amo hosu afina'mo afole aisige'apae'mo lusi kanamo aligae. 2 Vaya'mogimo apakai'apieke'mo hapauge monie'mo hapa'ye huge apakai'apieke'mo ge hu'a apaki'apile'mo ali'a asaga huge ala vaya'mo mai'none, hu'a apakesamo afige hu'a faipa hu'a apatege ita'api afo'apimogi ge'apimo o'afige hapao ke osege apaote kava'mo osuge hu'a maigae. 3 Apakaemo afamo anaga'apie'mo ohapauge vaya'ai hosu kava'apilefe'mo afa'a ateyo, hu'a osuge hu'a faipa hu'a apatege hapau'niya kavate'mo alagepa hu'a yagai'a o'apatege hapau hu'a o'apatege muki alagepa kavatefe'mo apaini hu'a atege hu'a maigae. 4 Apakaemo kutulu ya'mo nege apakesamo o'afi'ne'a malage hu'a huge ala vaya'mo mai'none, hu'a himu'namu gemo huge hu'a Gotife'mo ohapau'nisige'a apakufamo'mo hau'niya kavafeke'mo apamogaga aigae. 5 Apakaemo Gotife'mo amega apakufaleti'mo mono nehaya'mofe'mo nehaya kava'apileti'mo hu'apae'mo, Goti himamu'aleti'mo apaipafi'mo ali'ya'mo no'aliye, hu'a ali'a apave neliye. Ani agufa vaya'mo apataleka kaote maiyo. 6 Mago ani agufa vaya'mogi vaya'ai nopi'mo kesi kateti'mo hai'a alagepa hu'a apakesamo no'afiya a'ne anaga'aina ge'apileti'mo nofi kigekana hu'a ne'apatae. A'nemogi hosu kava'apimo'a lusi kana hu'nigeno asole yafe'mo hapa'ye nehiya kava'apimo'a apavayu hulino ne'viye. 7 Muki afina'mo gemo afige afige hu'a mai'naya'monanafa lama gemo afa'a afi'a aeto osugae. 8 Akeya'vilagamo Yanisi'e Yamalisi'e'mo Mosesefe'mo kame hu'ana ate'na'a kava hu'a ani vaya'mogi lama gelefe'mo kame hu'a ne'atae. Apaipa apakesamo kasali'niya yakana huno hane'nige'apae'mo aigofe apakesa afi'a fatago nehaya vaya'mo mai'nae. 9 Vaya'mogi Yanisi'e Yamalisi'e'mo hosu kava'animo agete'apae'mo, negi kava'mo hu'na'ae, hu'a hu'naya kava hu'a hemenimo muki vaya'mogimo ani vaya'ai hosu kava'apimo ago age'a ha le'a agegaya'mofe'mo mago'e hu'a afa'a humi o'apategae.

Goti ge'ale'mo atafauka alagi huvo, huno ha pai'niya gemae

10 Nehaya'monanafa kagaemo nehuva kava'nimo ago ageteka akame hu'nane. Ago age'nanana ali'na apaya male'nogeka ago nagege muki afina'mo na agufa kava'mo nehufi huka ago nagege ne'aluva ali'ya'mo'a na agufa ne'ya'mo afole aisiyafe'mo ali'ya'mo ne'alufi huka ago nagege Gotife'mo nagesa afi'na fatago nehugeka ago nagege gemo no'afiya vaya'aitegamo yagu yaga kava'mo hu'nogeka ago nagege Goti'e konagatimogi'efe'mo nahau nayamopafi'mo nahau'nigeka ago nagege kanamo ali'ne'nae'mo o'atale'na atafau'na alagi hu'na mai'nogeka ago nagege huka nage'nane. 11 Apaini hu'a nate'nageka nagege kanamo ali'nogeka nagege huka ago nage'nane. Nagaemo Atiyoki taonifatinagi Lisitiya taonifatinagi Aikoniyamu taonifatinagi hu'a hanageke ya'mo ali'a nami'nageka nagege huka nage'nane. Ala kava ne'mo'a muki hanageke kavapati'mo nagufamo alino katino nate'niye. 12 He, muki vaya'mo Yesu Kalaisipi'mo mai'ne'apae'mo Gotitefe'mo alagepa kava'mo nehisaya vaya'aife'mo apaini hu'a apategae. 13 Inagi hosu vaya'mogi humi apatesaya vaya'mo mago'e mago'e hu'a hosu kava'mo hute'a humi ne'apatesageno'ae'mo Satani'a apakae'e'mo humi apategaiye. 14 Humi apategaiya'monanafa kagaemo alino kaya male'niya vekamo ago age'nana'mofe'mo afiteka ali'nana gele'mo atafauka alagi hu'neka kagesa afika fatago hu'nana kavate'mo atafauka alagi huka maiyo. Alino kaya male'niya vekamo ago age'nana'mofe'mae. 15 Kagaemo aise mafa'nemo mai'nana afinateti'mo Goti aote mukufi avo'mo kae male'naya gemo afime afime eka hemeni mai'nane. Goti'a ani geleti'mo kagufamo alino katino kateno kahau vaisiyafe'mo alagepa kaipa kagesamo alino kamisigeka Kalaisi Yesufe'mo kagesa afika fatago hugane. 16 Muki gemo Goti mukufi'mo avo'mo kae male'naya gemo Goti avamusa'amo ai'niya gemo hane'niye. Alagepa huno hapa maesiyafe'mo alino apaya ne'maleya gemo hanege hosu kava'apimo alino apave neliya gemo hanege alino api aino ne'apateya gemo hanege fatago kava'mo hisayafe'mo alino ho huno ne'apateya gemo hanege huno hane'niye. 17 Goti'a ani geleti'mo vaya'amo alo huno ne'apateyanage'a hai'a hapai'ne'a muki alagepa kava'mo afa'a hugae.